2Cor 2 | ASO | STEP | Ee, naza nene mo ga'ne gele nge lo mino lengita gohi ma voloni' nene geni initeli'mi lulou' gohi lengele'mize molalove lo na'nise'ne o'ove losa nene nizada vamuve.

2 Corinthians 2

1 Ee, naza nene mo ga'ne gele nge lo mino lengita gohi ma voloni' nene geni initeli'mi lulou' gohi lengele'mize molalove lo na'nise'ne o'ove losa nene nizada vamuve. 2 Ido' neni' nolize izo minelodo' nele'mizi milalizave nene lengi' nizani' nenako naza nene lengi' nizada vo hetelo geni gono ma gehe-lingiduvodiniko zamotelite nene naza nolize izo minelodo' nele'mize miladine. 3 Ma minamadinako nemu' nene naza nolize izo minelodo' nele'mizi milalizave lengikumu' nene mulumo geni gehalove lo gelo ido' naza nolize ma izeloni' initekumu' nene linginesi a'minemu' longolize izilizave losa lengikumu' nene gele mu'musi' o mino a'mine luhuvo gize-lingiduvoni' gamazi nene gizuvoni' ve. 4 Ido' a'mine amuzo malehe gamazi lo luhuvo nite' gize-lingiduvoni' nene lu'ne ga'neu' nene lengikumu' geni nibilivo mino mulu'ne hukavo ve'ne novozo naba do'moze' moze' neivo nogizuvoni' nene lingine lutingu' mulumo gililizave losa nevoba asi neni' lu'ne naba goloso lengi' lengeme nouvoni' nene ningi gililizangumu' ve losa nene gizuve.

Goloso Nite' Dave Ma Nene Mo Lihime Imikeni' Nenako Idise A'mine Lihime've Nene Huli-disa Lutine Ha Imi Nizani' Nene Elebizilo Lo Paulo' Line' Gamazi

5 A'mine goloso nite' do geni do soto' ive ne'mo nene nenikovo' geni ma gehe-nedamive. Asi lengi' mukita nesi nene geni lingela gehe-lengedave. Ido' geni lingela gehe-lengedave noluvoni' nene do geni ogo lolosa gelamuve. 6 Ne neiha a'mine goloso nite' dosa lihime dave nene evene' mukilite lihime imi lihime've apasi-dani' nene modave. 7 A'mine ve nene gopo gala gelo geni naba geho mineline' ne'mo do ongo-dalize. A'mine lihime've gohi di minami huli-disa eze lulou' lamine' geleline' inite' i-di ele'mize lamine' ilo. 8 Ee, geni ne'mo nene do ongo-dalize. Lengita mulumo gani noluze. Eikumu' goloso gilami lutine ha imi nizani' nene ningo gelelize. Elebizilo. 9 Ido' a'mine luhuvo nite' gize-lingiduvoni' nene naza ne'mine mana'mine initekumu' luvoni' mamu' nene lingine gili daakovo' i nizahe lo a'minemu' monovotine do ningelove losa nene gizuve. 10 Lingine evene' mali'mi lihime've huli-dani' noline' nene nazasi hulo-delodo' o nouve. Ee, a'mine ve nene neni' lihime molo-nede noline' nene a'mine lihime nene mo hulo-dekuvoni' ma neive. Ido' lihime've huluvoni' nene Kilisito' velelo' lengikumu' ve losa huluve. 11 Nene nanitekumu' ve. Satani aza lele'mize gopo olosa gelaa' neine' nene mo gele nounako nemu' nene gote izo livile' ogalive losa a'mine ve'mi lihime've nene hulo-duvoni' ve.

Paulo' Toloasi Ebeku' Vo Gono Lamine' Nodangu' Nene Tito' Minamingumu' Lihitehe' Gala Gelo Hulo Makedonia Misubola Vavo O'moso'mo Hize Ele' O-dingumu' Line' Gamazi

12 Naza Kilisito' gamazi lamine' nene lo-ngemelesa Toloasi ebeta vo noheteluvo Guvelesi ve'mi gono do-delodo' aka nene ma soto' o-nidine'za 13 neze zuho Tito' nene a'mida minamivo ma votene' o-damo ezemu' nene ga'ne muki' gelo minuvoni' nenako ne'mo nene mine guno amoloni' ogavo a'midoti' nene mo minilo lo hulo-ngedo Makedonia misubouko ezemu' vise' olosa vuvoni' ve.

14 Ne'mine uvoni'za O'moso'mo gamene gamene hize ele' o-ledaa' neingumu' nene opo'ni noluve. Aza nene Kilisito' biluva've ngivile' ogo osu' lingumu' lolize izo unuvo huhu lo minine' guvele nene numudo' namado' lo soto' olonido' nene lele'mize molavo monaa' noune. 15 Ee, Kilisito' gamazi lo-ngeme'mo monaa' nounive laza unuvo ne'mine noune. Ado' lovou' gomu' molaa' ive'mo biluva've ngivile' ogo a'minemu' olize izo vaa' neida nene unuvo huhu lo minaa' ine' sokile nene gizikevo hutile' ogavo eze zuho gilavo lanite' ogavosa ido' biluva've linge a'mingu' ngele'mizi monave nene gilisa leli' libililisa nave li gilavo a'mine unuvo nene goloso lolo' oga' neine' ne'mine nene none. O'moso'mo gelavo laza Kilisitodati' unuvo lamine' ezela dizine' ne'mine nene none. A'mine unuvo nene lukuvo nalizavetingukisi ido' vi tolovo ilizavetingukisi nene hutile' oga' neive. 16 Ido' a'mine unuvo nene vi tolovo ilizavetida ogosa hililizani' monovo'ine do soto' o-ngedosa ngebele helaa' unuvo gehepeve lolo' oga' neive. Ido' lukuvo nalizavetida ogosa minevo' minevo' ilizani' monovo'ine do soto' o-ngedosa do ve'ine gize-ngedaa' ine' unuvo lolo' oga' neive. Ne'mine oga' neinako a'mine meuko noluvoni' gonolo' nene zamote dalizado' lisihe' i nizave. 17 Evene' hamolitesi lisihe' mo amune'za laza nene evene' linge muki' go'ine izi moni polopeti lili' ilisa O'moso'mi gamazi di monaa' nadi'mine amo O'moso'mo do ote-ledavo asi've O'moso ninge neivosa nene Kilisitoda mine molo mino do voziu' vomiu' amo gono lisihe' lamine' dosa nene O'moso'mi gamazi laa' nounako a'mine gono nene leli' ne ha dalonido' o neive.